ཀ་ཁ་ག་ངའི་སྐུ་ཚེ་བརྟན་པར་ཤོགས།

༡

ལྷ་ཀླུ་གཉན་གྱི་ནང་འཛིན་བོད་པ་ཡིན།

མགོ་ནག་བོད་པའི་ནང་འཛིན་དམ་ཆོས་ཡིན།

དམ་པའི་ཆོས་ཀྱི་ནང་འཛིན་ཀ་ཁ་ཡིན།

ཀ་ཁ་ག་ངའི་སྐུ་ཚེ་བརྟན་པར་ཤོགས།

ས་སྒང་མཐོན་པོའི་ནང་འཛིན་བོད་པ་ཡིན།

མགོ་ནག་བོད་པའི་ནང་འཛིན་བོད་སྐད་ཡིན།

བོད་སྐད་གཙང་མའི་ནང་འཛིན་ཀ་ཁ་ཡིན

ཀ་ཁ་ག་ངའི་སྐུ་ཚེ་བརྟན་པར་ཤོགས།

༢

ཁམས་པའི་བུ་མོ་སྡོང་མགོའི་སིལ་ཏོག་འདྲ།

ཁ་ཚིག་སྙན་མོ་ཁུ་བྱུག་སྔོན་མོ་འདྲ།

རྣ་དང་མིག་ལ་ཐོབས་པའི་བདེ་བ་འདི།

ཀ་སྣ་སུམ་ཅུ་ཤེས་བའི་བཀའ་དྲིན་ཡིན།

ཀ་ཁ་ག་ངའི་སྐུ་ཚེ་བརྟན་པར་ཤོགས།

ལྷ་སའི་བུ་མོ་རྨ་བྱ་སྔོན་མོ་འདྲ།

གུས་ཚིག་སྙན་མོ་མར་ཁུ་སེར་པོ་འདྲ།

རྣ་དང་མིག་ལ་དབང་བའི་བསོད་ནམས་འདི།

ཀ་སྣ་སུམ་ཅུ་ཤེས་བའི་བཀའ་དྲིན་ཡིན།

ཀ་ཁ་ག་ངའི་སྐུ་ཚེ་བརྟན་པར་ཤོགས།

ཨ་མདོའི་བུ་མོ་རི་དྭགས་རྨས་མ་འདྲ།

སེམས་གཏམ་དྲོན་མོ་བདུད་རྩི་བསིལ་མ་འདྲ།

རྣ་དང་མིག་ལ་རེག་པའི་བགོ་སྐལ་འདི།

ཀ་སྣ་སུམ་ཅུ་ཤེས་བའི་བཀའ་དྲིན་ཡིན།

ཀ་ཁ་ག་ངའི་སྐུ་ཚེ་བརྟན་པར་ཤོགས།