ངས་མི་འདོད་རྒྱུ་ཞིག་འདོད་ཀི།

 

ཁ་སང་དེ་རིང་སེམས་པ་མི་སྐྱིད་ཀི།

གྲོགས་ཀྱི་སེམས་གཏམ་གོ་ན་མི་བསོ་གི།

སྙན་མོ་བཤད་ཀྱང་ཉན་ན་མི་འདོད་ཀི།

ཁ་མཚར་བཤད་ཀྱང་དགོད་རྒྱུ་མི་ཡོང་གི།

 

ཆུང་མའི་འཛུམ་མདངས་རིག་ན་སྙིང་ལང་གི།

ཞི་མོའི་གཅེས་གཏམ་གོ་ན་རྣ་སུན་གི།

ཕྱོགས་རྒྱུའི་མགྲོན་པོ་མཐོང་ན་མིག་ཚ་གི།

རང་གིས་རང་ལ་བལྟས་ན་ཡིད་ཆད་ཀི།

 

སེམས་ན་སྡུག་གི་མགྲོན་པོ་བཙན་པོ་ཞིག།

གོང་མ་གནམ་གྱིས་མངགས་པའི་ཕོ་ཉ་ཞིག།

ལན་ཆགས་ལུས་ཀྱི་སྟེང་ལ་ཁུར་བོ་ཞིག།

ཡུལ་གྱར་འཚོ་བའི་མནར་གཅོད་ལྷག་མ་ཞིག།

 

རི་མགོ་མཐོན་པོའི་རྩེ་ལ་འགོས་ཏེ་སྐད་ཤུགས་ཆེན་པོས་ངུ་ན་འདོད།།

བྲིས་བྲིས་ཚང་མ་དུམ་བུར་གཤགས་ཏེ་ཐབ་ཁུང་ནང་ལ་རྫོངས་ན་འདོད།།

གློག་ཀླད་ངོ་ལ་རྡོག་པས་གཞུས་ཏེ་གད་སྙིགས་ནང་ལ་གཡུག་ན་འདོད།།

གོན་རྒྱུ་ཚང་མ་རླུང་ལ་བསྐུར་ཏེ་ལྭ་མེད་ལུས་བོ་རྒྱུག་ན་འདོད།།

རིག་རིག་ཚང་མའི་ཐོང་རྩའི་བཟུང་སྟེ་མཆུ་མ་གདོང་ལ་གཏོར་ན་འདོད།།

བཤད་རྒྱུ་རྩོད་རྒྱུ་ཅི་ཡང་མེད་ཀྱང་ཕ་རོ་ཟ་ཞེས་སྡིགས་ན་འདོད།།

ཕྱུག་པོ་ཚང་མའི་དངུལ་ཁུག་འཕྲོག་ཏེ་སྒོར་མོ་མེ་ལ་སྲེག་ན་འདོད།།

མེད་པོ་རྣམས་ཀྱི་སྐེ་ཐུ་གཅུས་ཏེ་མུག་སྐད་གཏན་དུ་གཅོད་ན་འདོད།།

བཙན་པོ་དག་གི་རླིག་པ་བཅད་དེ་ཁྱི་དང་ཕག་ལ་སྟེར་ན་འདོད།།

གཉོམ་ཆུང་ཚང་མའི་རལ་བས་བཟུང་སྟེ་རྐང་པའི་འོག་དུ་གནོན་ན་འདོད།།

ས་ཡི་གོ་ལ་ཧྲིལ་བོ་འདི་ལ་བཟོ་བཅོས་ཐེངས་གཅིག་བྱེད་ན་འདོད།།

ཚིག་གི་རྐང་བ་སོ་སོར་འཐོར་ཡང་དྲན་ཚུལ་ཡིག་ངོར་འཕབ་ན་འདོད།།

འདོད་པ་འགྲུབ་རྗེས་ཕ་རེ་སི་ཡི་ལྕགས་སྡོང་མགོ་ནས་ལྡིང་ལ་འདོད།།

༧ཡིད་བཞིན་ནོར་བུས་ཡུན་རིང་གསོས་བའི་མུག་ཕྲུག་གཡང་ལ་མཆོང་ན་འདོད།།

ཕྱི་མའི་ཡུལ་ན་བདེ་བ་མེད་ཀྱང་ད་ལྟ་རང་ལ་འགྲོ་ན་འདོད།།

གཏན་དུ་གྱེས་བའི་ཕ་མ་གཉིས་ཀའི་ལམ་ཁ་དེ་ལ་ཞུགས་ན་འདོད།།

སྙིང་ནས་གཅེས་བའི་གྲོགས་ཤིག་ཡོད་ན་རེམ་མ་ཤོགས་ཞེས་འབོད་ན་འདོད།།

 

འདོན་སྤེལ།: ༢༠༠༩/༡༠/༠༧